وكر لوباش

يالشرعيه ويش ســـــويشي ســويش لي حاكم دحباشي                  ماباشروعش تشرعنا والعدل والحريه ماشـــــــي

خليشـــــــــــــيني ليه بالظلمه والنور مني بيتلاشــــــي                    ماعد ببصر سوى ضلي مبهور بك ياتعماشــــــــي

لا بل ابوش بل ولا بلــــــش ياغاب ياوكر لوباشــــــــي                   يشل ابوش ايش ماشلش مانا علي عهد ماباشــــي

مادام عادش قفا جهلش مابين احمق وبطـــــــــــــاشي                   باينهبوش كالوحوش تنهش منش ولاعاد يبقا شــي

كم هيه دراويش تتــــــــــهبش متكلبشه لابسه اكواشي                   كالبوش لبوش لابلش مثل الصناجع ولكـــــــــباشي

هذوك جايع وذا مثـــــــــله وذا العشى ماتعـــــــــشاشي                  وذي بيجـــــــــــــري قفى بطنه باتلغطه مثل قشاشي

مايمشو  الا على الرشوه بطــــــــــــاش لاجنب لــطاشي                  طبع الجشع مابيقـــــــــنع شي معتاد ان يستلم كاشي

اعطيت له كل مابجيبي وقال لي هات لي عاشـــــــــــــي                   لعنه على المرتــــشـي لعنه والف لعنه على الراشي

هذه حقايق بنعلنها عن وضع منهار لاقصــــــــــــى شي                 الحاضر اسوى من الماضي يالشرعيه مابيخفاشـــي

الفقر خيم على ارضش وكادرك ما بـيــــــــــــــــــعلاشي                 كم هيه ضحايا بتتالم وكم وكم ذي قد افـــــناشـــــــي

كم شخص ذي على العمل عاطل خلفش كم هم ضحاياشي               طيار ياجر معه تكســــــــي من بعد ذاويــــش خلاشي

فوضه وضوضى في الشرطه اما المرور ماتربـــــــاشي                والقاضي ختمه معه بجيبه اعطه ويختم على الماشي

كما الادارات ماتعمل اعمالهم مابتتـــــــــــــــــــــــماشي                  الواسطه والفساد يلعب مثل المرض ذي بيتفاشــــي

محتال كون بني ثروه سيطر على دروب واحــــــــواشي                 والكادح اصبح خلي معدم حتى الدفى مابيدفاشـــــي

ما الشيخ لاقام يتجول كانه القــــــــايد البـــــــــاشـــــــي                  بعده جحافل بتتهركل محمي بسبعين رشـــــــــاشي

لا امن لا حقوق تتوزع لا كهربه لا طـــــــــرق لاشـــــــي                 وثروة النفط تتوزع على ابن صالح وبجاشـــــــــي

كم الـــــمغالط يغالطنا باقوال من منـــــــــــــــطلق واشي                  لا والنبي ماتعاهدنا وانت محتال قــــــــــــــــشاشي

قد قلت وبينت لك قولــــــي ارضــــــاك ولا لاترضــــاشي                من بعد ما اسلبتني حقي ماشي معي بك ثقه ماشي

وين الذي كان يسندنا مافاق مرمي بالانـــــــــــــــــعاشي                 حطو له القيد في رجله من غفوته مابيصاحــــشي

قد كنت متامل القاده لجل الوطن مابيغلاشـــــــــــــــــــي                   ياللاسف خيبوا ظني وخربوا فكر لمـــــــــــشاشي

لعا شهامه ولا نخوه جــــــــبروتهم مثلما الفاشـــــــــي                   ياشعب هم ضيعوا حقك خلوك ماعاد تسوى شــي

هذا العراشي بدا واختم قيفان من واقعٍأً عاشـــــــــــــــي                   وختمها عالنبي صلي ماغردة فرخ الاعـــــشاشـي

الشاعر :حمود عبدربه عراش السعدي